الـــــعـــوض
زي ما في ناس بتستهلك وبتستنزف كل طاقتك، وبتطفي كل حتة
منورة فيك، في ناس بيبقوا جنة.. نور بتشوفه بقلبك قبل عنيك.. ناس بتطبطب على روحك
وبتراعي خاطرك وتراضيك ..
ناس وجودهم أمان وإحساس بالسكينة والونس .. مش بس كده
الناس دي بيبقوا عوض و دوا بيعالجوا بطيبتهم كل حتة فيك إتأذت مع الوقت.. بيدووا
روحك اللي كنت فاكرها مستحيل ينفع معاها أي دوا.
ناس بتصبر على غبوتك.. قادرين يفهموا إنك مستهلك .. جايز
يكونوا مش فاهمينك بس حـــبينك .. فطول الوقت بيحاولوا ويعافروا معاك وهيفضلوا
يعافروا مش هيأذوك مش هيعملوا الحاجة اللي بتخوفك ويبعوك .. الناس دي مش شيء خيالي
ولا أبطال روايات لأ .. ولا انت مبقتش تحس ومؤذي .. وهتتعبهم معاك زي ما ياما ناس
قالتلك كده.. وياما إنت نفسك قسيت على نفسك .. هما بس هيشوفوك من جوا أووي وهـــيحبوك
.
هــيحبوك زي ما انت بكل حتة موجوعة فيك .. بكل حتة في
روحك متدغدغة .. هيحبوك بجد.
فببساطة هيستحملوك .. وبكل طاقتهم هيحاولوا يقوك ..
هيأمنوا بيك في عز ما انت مبقتش عارف نفسك .. وطول الوقت بتسأل نفسك .. هو أنا
موجوع ! هو أنا تعبان!
هو اللي بيحصل دا حقيقي!!، هيكونوا هما جنبك، كدبت أمانهم ..عذروك وفضلوا يكرروا في محاولاتهم.. ووعدوك إنهم مش هيعملوا دا .. كدبت وعدهم .. دا طبيعي حقك .. ما هو ياما ناس غيرهم وعدوك .. فالناس دي من تاني عذروك .. مش شرط علشان فهموك لكن عشان حــــــــبوك.. وصبروا وعافروا .. وفضلوا طول الوقت بيحاولوا يفهموك .. فانت صدقت
أخيرًااااااااا صدقت .. بانت حقيقتهم .. بانت حقيقتهم في التفاصيل.. وصحيت مش عارف هل خفيت ولا انت بتحلم !
صدق يا عبيط .. زي ما انت كنت في يوم جنة لناس رفضوا النعمة .. جالك رزق ونعمة في هيئة ناس .. ناس قلوبها طيبة وصادقة.. فإحمد ربنا على النعمة وحافظ عليها تدوم .. حافظ عليها تــدوم
متخفش .. مش تخاريف دا العوض بتاع ربنا اللي انت طول
الوقت مؤمن بيه، مشكلتك بس كانت خوفك، وأديك في أمان .. إطمن بقا وبطل تفكير ..
وإهدي.. ونــام .
تعليقات
إرسال تعليق