ويــارب تــرضـي

 

هتلبس تيشرتاتك، وبنطلوناتك، وهتستولي علي الشبشب بتاعك.. فمتشغلش بالك وتدقق.. لأنك مش لوحدك .. كل أخواتك الرجالة كده .

في الشتاء إتغطي بغطا لوحدك عشان لو اتشاركتوا في نفس الغطا هتشدوا من عليك وتنيمك طول الليل من غير الغطا .. ومش بعيد تلاقي نفسك تحت السرير .. صدقني بتحصل.  

 ماتقللش من حاجة جابتها في عفشها.. علشان هتزعل قريب، ما تمنعهاش عن أهلها، ولا تجيب سيرتهم بالوحش.. مش هتكسب غير قلة راحتها وجو كئيب في البيت.. فإرضي بنصيبك وخلاص.  

إنتي صح، ومتجادلش.. التغافل والتفويت بيختصر حوارات كتير، وبيوصلها إنك عاقل وباقي عليها.

 إوعاك حد يعرف سرها وتفاصيلها، حتي ولو كانت والدتك.. الخصوصية، الخصوصية، الخصوصية.. الست بتتعامل مع شقتها علي إنها ملكة فيها.. فماتسمحش لحد يتحشر في مُلكها.. بعد إذنك.

 لو ساعدت مامتك في حاجة أو والدك بوس راسها وإعترف بفضلها، وهي هتقدر ده جدًا .

 الست تحب الراجل الرومانسي بس مش هايف، القوي مش العنيف، الكريم بس مش مبذر، الغيور بس مش شكاك ومُرهق، الطيب لكن مش ساذج وبريالة.

 "الكلمة الحلوة" بنزين مجهود الست..  ممكن تنحت بضوافرها في الصخر لو سمعت الكلمة الحلوة منك.

ممكن تلاقيها بتعيط لو المواعين زادت عليها، أو وقع منها حاجة بهدلت الشقة.. إزعل علشانها ومتاخدش الأمور ببساطة.. مشاكل الشقة عندها زي بالظبط إحساسك لو عندك مشاكل في الشغل.

 لو قالتلك مخنوقة، مُكتئبة.. هي مش مستنية كلام ونصايح منك.. كل اللي عشمانه فيه حضن وطبطبه يجبروا خاطرها.

 الاحترام زي عامود الخرسانة.. هو اللي شايل العلاقة ومخليها مكملة.. احترمها في غيباها ووجودها.. لأن الراجل الهايف هو بيقلل من مقام الست بتاعته.

 قولها: "ست البنات هي إنتي.. حبيبتي وصاحبتي وبنتي" حسسها بأنوثتها وشبعها بيك، وإن اللي بتعمله معاك كتير مهما قل.

 بلاش العتاب الطويل، ولا التأنيب المستمر، ولا التدقيق علي الكبيرة والصغيرة.. عدي، وكبر دماغك، متبقاش نكدي، وخليك عارف إن كتير من كلام الست مبتبقاش تقصده.. اه والنعمة.

إزعل في شقتك، ومتسبش سريرك، متعودهاش إنك لما بتزعل بتبعد.. تخرج أو تدخل أوضة تانية.. هتتعود علي كده، وهيبقي زعلك مع الوقت شيئ معروف وبعادك متاخد عليه.

 عيوب كتير بيغطيها الكرم..فبلاش البُخل لو عاوزها تعشقك.. فك إيدك و هتلاقي قلبها بتاعك.

الهدية.. مش لازم تبقي غالية.. المهم إنها تيجي من غير طلب.. إنشالله مصاصة.. هي طفلة كبيرة أصلاً. 

متحاولش تنصحها أو تعدل عليها وقت الزعل.. أكتر وقت تقدر الست تسمعك وتطيعك فيه لما تبقوا رايقين.

زور أهلها وهاتلهم حاجة حلوة علي قد إيدك، ومتقولهاش.. أمها هتقولها متخافش.. وساعتها هتحسسك إنك باشا مصر.. وهترضي عنك.

 مش كل شوية تقولها هطلقك أو هتجوز عليكي حتي ولو بهزار.. الكلام ده بيخرب العلاقات لأنه بيفقدها الأمان، والأمان بوابة إستمرار المحبة.

 اطبخ بدالها في يوم، وإغسل المواعين، ومش عيب لو عملت الشاي، وممكن تقولها هنجيب أكل من بره النهاردة.. لو حسيت إنها تعبانة في يوم من شغل البيت، وخلي بالك الست زي الجمل زي ما بتخزن الوحش بتخزن الموقف الحلو وتشيلهولك.

 الخروجة.. مش هقولك مرة في الاسبوع.. خليها مرتين في الشهر، ومش لازم تاكلوا في مطاعم غالية المهم إنك تشممها هوا وتروق عليها كده، عشان تروق عليك.

خد رأيها وإشركها.. متاخدش خطوات تعرفها زيها زي الغريب.. دي حاجة بتسبب ألم كبير جواها، وقلة ثقة في نفسها.

 وهي قاعدة جنبك ابعتلها رسالة على الفيس وقولها بحبك، عاكسها.. إتلحلح كده .. عاملها كأنها خارجة من فيلم هندي.. وإعمل فيها البطل وشيلها.. بس خد بالك تقع بيها.. تبقي روحت في ستين داهية.