انت وحيد

 

أنا من الشلة اللي كانت بتهرب من المدرسة وتزوغ من الدروس، أنا من الشلة اللي كانت بتشرب سجاير في حمام المدرسة واتقفشوا كذا مرة، أنا من الشلة اللي كل أحلامها تخرج وتقعد في كافيهات وقهاوي، أنا من الشلة اللي كان كل أحلامهم يصاحبوا بنات، أنا من الشلة اللي الدنيا كلها جت عليها وبدأوا يهربوا من الواقع ويشربوا مخدرات، أنا من الشلة اللي المجتمع كله ضدهم وشايفهم فاشلين كلهم، أنا من الشلة اللي أهاليهم كانوا بيكسروا فيهم وبيبهدلوهم  ويقللوا من قيمتهم دايمًا، بس أنا برضو الشخص اللي قال كفاية لحد كده..

أنا الشخص اللي مشتكاش من قلة الفلوس ونزل اشتغل في قهوة علشان يعيش ويعرف يصرف على نفسه، أنا الشخص اللي قرر ياخد خطوة ويسيب الشلة دي ويمشى ورا أحلامه ويبهدل في نفسه علشانها.. أنا الشخص اللى قرر يتغير، اللي قرر يطلع بره الصندوق ويشوف حياته كويس ويرتبها، أنا الشخص اللي مفضلش واقف مكانه ويعيط..  

انت وحيد لإنك مش مبتذل، لإنك مش بتشبه تكرارهم، لإنك مش قادر تتنازل وتنزل بمستوى تفكيرك لتفكيرهم الساذج الأهبل .. أنا بشجعك على وحدتك طول ما انت بعيد عن الإسفاف والقذارة الموجودة حالياً على أرض الواقع ..

ولإنك وحيد فَـ أكيد لازم تستغل وحدتك في حاجات مهمة ، فيه ناس بتقرأ يوميًا بمعدل خمس ساعات في اليوم وبعد فترة بيكونوا موسوعات علمية متحركة، في ناس بتشتغل على عقلها ومهاراتها وبتمنى تفكيرها طول الوقت..

وفى الوقت اللى انت بتشكى فيه ده غيرك بينزل يدور على كورسات ويحقق إنجازات، خلى وحدتك وحزنك دافع ليك تحقق المستحيل.. اشتغل على نفسك لحد اليوم اللى متقدرش تعد فيه معارفك وصحابك، لحد اليوم اللي شغلك ينسيك فيه انت المفروض تكلم مين أو تسأل على مين..  

علشان اختصرلك الكلام ..

اطلع بره حياتك، شوفها من بعيد وكأنها لعبة على تليفونك، أبدأ نظمها، اشتغل على أحلامك وارسمهم قدامك دايمًا، خليك في حرب مع نفسك.. اللي بيأذيك ابعد عنه، اللي بيوقفك وبيحبطك اوعى تسمعله..

 الماضي دا راح وانتهى، مبقاش بتاعك، أما المستقبل فهو انت، حياتك رواية وانت البطل، وعقلك قلمك وسيفك، فـ اسعى لأجل في يوم تحب نفسك، ياما تتغير دلوقتي ياما تنتهى، أبيض أو أسود، مفيش رمادي ..