الحب المطلق

أجمل حاجة فى الدنيا إنك تلاقي حد يحبك حب مطلق، يحبك بدون مقابل يحبك بدون مصلحة، يحبك لنفسك زي ما هي، يحبك حب التقبل التام، يحبك بمميزاتك وبعيوبك، يحبلك السعادة علطول، يحبلك الفرحة دايمًا، يحب يشوفك مبسوط، مش عايز منك حاجة غير إنك تكون فى أحسن حالاتك ومبسوط، قلبه بيطمن بوجودك، قلبه بيحس بالهدوء جنبك، بيبعد بيك عن الدنيا وزحمتها، حاطك فى كفة والعالم كله فى كفة تانية، مش عايز من الدنيا غيرك، عارف أدق تفاصيل حياتك، مش بتحلا الحياة غير بيك، لو اختفيت يدور عليك، لو بعدت يقرب منك، لو زعلت يخاف على زعلك، لو اتضايقت يخفف عنك، لو احتجتله يكون سندك ، لو كل الناس تخلت عنك هو لأ مستحيل يتخلي عنك، لو كل الناس فهمتك غلط هو لأ، لو كل الناس بعدت وسابتك هو لأ ميقدرش يبعد عنك أبدًا ..

والأحلى بقا من كده لما تكون ضامن الشخص دا ضمان مطلق، ضامن إنه مش هيبعد عنك، ضامن إنه مش هيزعل منك، ضامن إنه مش هيفهمك غلط، ضامن إنه سندك طول الوقت، ضامن إنه في ضهرك علطول، عمرك فى لحظة ما تشك فى إنه يسيبك، عمرك فى لحظة ما تشك إنه بيدور على غيرك، عمرك ما تشك إنه بيخونك، عمرك فى لحظة ما تفكر إنه ممكن يمشي، مجرد التفكير أصلا ميجيش فى خيالك، مجرد إنه وحش ميخطرش على بالك..

والأجمل إن الشخص دا يديك الأمان المطلق، مهما حصل مش خايف تحكيله، مهما كان مش متردد تشكيله، بتحكيله عن كل شيء وأي شيء من غير خوف، مش خايف من رد فعله، مش خايف يفهمك غلط، مديك حرية الكلام، مديك حرية الفضفضة، عمرك ما خفت وإنت بتقوله حاجة، عمرك ما شكيت إنه هيزعل منك، لدرجة إن لو إحساسك بدأ يتغير تجاهه لأي سبب تجري عليه وتترمي فى حضنه وتقوله أنا خايف من مشاعري ناحيتك، أنا مش عايز أمشي وأسيبك، أنا مش عايز أبعد عنك، مش عايز أحس بأى شيء وحش ناحيتك، إنت حبيبي وأنا بحبك وهفضل أحبك..

لو الإنسان دا موجود في حياتك، حافظ عليه، خليك جنبه، متفهمش خوفه عليك غلط، متفهمش غيرته عليك غلط، متفهمش أي حاجة بيعملها غلط، لإنه أكيد أكيد مش بيكون بيعمل حاجة غير علشان بيحبك، ولو حسيت إنه غلط فيك سامحه، أو إنه زعلان منك صالحه، أو إنه مضايق منك خفف عنه، أو إنه محتاجلك إترمي فى حضنه، علشان الإنسان دا مش هيتكرر تاني فى حياتك أبدًا، فمتفقدوش مهما حصل، ممكن تلاقي حد يحبك تاني، لكن صدقني مش هتلاقي حد يحبك زيه، ولو مش موجود إدعي ربنا يرزقك بواحد زيه علشان فعلا الحياة بيختلف طعمها مية فى المية لما يكون فى حياتك..  ولو لسه بتدور على شريك حياتك متقبلش بحد أقل من كده أبداً لإنك تستاهل تتحب وتتحب بجد كمان .. وركز كويس وإنت بتختار لإن مش كل الناس قلبها بيعرف يحب بجد وصادق في مشاعره ..     

 وربنا يرزقكم باللي يحبكم الحب المطلق، ويديكم الأمان المطلق، وتضمنوه الضمان المطلق ..