سيبك من "الكيوت"

لما تيجي تحب أو ترتبط سيبك من " الكيوت " اللي بيلمَعوا وطول الوقت الدنيا عندهم ضحك وبسيطة بس، مش بيسدّوا في الأيام الصعبة ( والأيام الصعبة جاية جاية صدقني ) هقولك بقى تدور على ايه ..

دور على حد مطحون زيك يقدر يستوعب صراعاتك ..
دور على حد من كتر ما شاف وجرب قادر يستوعب رحلتك ومستعد يكتشفك معاك ومايزهقش ..

وانت بتدور على حد يونسك باقي حياتك دور على حد "مجروح مشفي " يقدر يعيط معاك اه، بس في نفس الوقت قادر يساعدك ويوقفك على رجليك تاني ..
قرب من اللي عدى بلحظات اكتئاب كتير وطلع منها صالب طوله.
صدقني ما هايقف جنبك ويسندك اوقات كتير غير شخص زي ده شاف أسوأ ما في الحياة وقرر يكمّل للآخر ..

يمكن الصورة سوداوية ومش بمبي زي الله يرحمها سعاد حسني ما قالت، بس افتكر إن سعاد حسني نفسها جالها اكتئاب في اخر أيامها ومنفعهاش معتقد الحياة " بمبي " ده ..

الحياة صعبة .. واحنا أصعب .. وبنصارع عشان نفهمنا قبل ما نفهمها .. ومفيش حاجة هتساعدك في رحلتك غير حد كتفُه في كتفَك يكتشف الحياة معاك ويسدّ في صراعاتها لحد ما توصلوا انتوا الاتنين لنهايتها ..

فااختار حد شبهك .. يشيلك وقت ما تبقى مش قادر حتى تشيل نفسك .. اختار حد من كتر ما شاف واتعلم، روحُه تقدر تساع روحك وتحتويها .. روحُه تقدر تونس روحك وسط لخبطة وعشوائية وعبثية الحياة ..

لأن لو اختيارك غير كده هتكمل لوحدك حتى لو ارتبطت .. غير كده هاتشيل الشيلة كلها على كتافك .. غير كده هاتبقى لوحدك حتى لو لازق في حد تاني بقيت حياتك، اصل الونس مش بقرب الجسد لكن بقرب الروح ..
فاختار اللي روحه تونسك وتدفي برودة الحياة حواليك .. لإن لو معملتش كده .. ماظُنش هاتقدر تكمّل لوحدك كتير ..