زمان ... ودلوقتي

زمان لما كان راجل البيت يرجع من شغله، ويتغدى مع عياله، ويدخل يريح شوية، ويصحا على المغرب، ويقول لمراته اعملنا كوبايتين شاي، وتعالى نقعد في البلكونة شوية، تقوم أم العيال تعمل كوبايتين الشاي التمام، وتجرى وراه على البلكونة؛ عشان تتمتع معاه بأحلى وقت من الحكايات والضحك اللي من القلب، ما كنش في بقا لا نت ولا فيس ولا أي حاجة، تخلى طرف من الاتنين قاعد مشعول عن الطرف التاني ولا بيسمعله وهو مركز في حاجة تانية.

قعدة بسيطة وكوبايتين شاي بس بالدنيا وما فيها، قعدة بسيطة تلاقى فيها الكلمة الحلوة، والضحكة الأحلى، كانت قعدة بسيطة جداً، لكن كانت تساوي حاجات كتيرة.  

بعكس دلوقتي ... تلاقى الناس مخنوقة مش قادرة تقعد مع بعضها، ولا تحكى مع بعض، ولا تفضفض لبعض، راحت الأيام دي. 

 

زمان كان البيت فيه 10 عيال، ولاد وبنات، كانوا متربيين أحسن تربية، ودلوقتي البيت فيه بس ولد وبنت وجايبين المرض لأمهم وأبوهم. 

زمان كان البيت فيه تليفزيون واحد، وقناة واحدة، ونعرف أخبار الدنيا، ودلوقتى كل أوضة فيها تليفزيون، وألف قناة، ولا حد يعرف عن التاني حاجة. 

زمان ما كنش حد يعرف حاجة عن الصحة واللياقة البدنية، وكنا أصحاء، وفي أفضل لياقة بدنية، ودلوقتي الكل بيتكلم عن الصحة والرياضة، وتلات أرباع الناس عيانة وتعبانة.

زمان كانوا يدرسوا ويتعبوا، ويطلع عينهم على لمبة جاز، ويفرحوا بالشهادة، وما كنش في حفلات نجاح ولا هدايا وكانوا مبسوطين.

ودلوقتى ... الأم والأب يذكروا للعيال، ويجيبوا لهم مدرسين خصوصيين، ويطلعوا مش فاهمين حاجة، والكل ناجح ناجح، وتعالوا شوفوا الهدايا والحفلات.

زمان كان البيت فيه صالة ومطبخ وأوضتين، وكان البيت مفتوح للكل، ودلوقتى... مساحات ايه وليفنج وصالونات، ولو حد فكر يزور حد لازم يتصل الأول وياخد ميعاد.

زمان كانت الناس تنام على الأرض، وكانوا في قمة الراحة، ودلوقتى... الفرش بالشيء الفلاني، ولا يناموا مرتاحين، وكوابيس طول الليل.

زمان متغيرش... إنما النفوس هي اللي اتغيرت، وغيرت معاها كل حاجة حلوة.