نصيحة ليا وليك

عزيزتي حواء : 

 اللي شاطر في الحب الحنين أبو قلب خساية، خايف في الحياة الواقعية وبيدور على شغل وملوش في الجواز.            

  واللي فاتح في الحياة الواقعية، وبيلبط مع خلق الله على لقمة العيش، هتلاقيه فاشل في الحب والرومانسية، وبيرجع من  الشغل شايل بطيخة، هتلاقيه صنم ابن صنم.       

   مفيش راجل على وجه الأرض بتتكون فيه كل أحلامك، وخيالاتك الوردية، وأفلامك السينمائية.                            

  ولو لقيتي الراجل الكامل الخرافي دا، هتلاقى الأرواح الشريرة مسيطرة عليه، وعايش في اختيارات أمه أو فى جلبية أبوه أو في طبيعة أخواته.

عزيزتي حواء ... العيب مش فيكي، إنما العيب في أحلامك، وأفلامك في مجتمع مفهوش أحلام ولا خيال.                    

عزيزي أدم :

الست مجرد انعكاس ليك، هتعاملها زي نبيلة عبيد في الراقصة والطبال، هتعاملك زي أحمد زكى فى الراقصة والطبال بالضبط .

الحياة اللي بتدور عليها هتلاقيها مع الست اللي بتحبك وعايزاك، والبنت الشمال كانت ضحية للواد الشمال، وبرضو البنت المحترمة للواد المحترم.

البنت بتأخد صفات الراجل اللي بتتعامل معاه بالملى ومفيش حد مش بيتغير بس المهم يكون عايز وحابب يتغير.

عزيزي أدم ... لو ركزت شوية، هتلاقى زينات صدقي اتحولت لسعاد حسنى، ومريم منير اتحولت لكريمة مختار .

عزيزتي حواء ... عزيزي أدم :

ابذلوا شوية مجهود علشان تفرحوا، وخلوا أحلامكوا على مقاس قدراتكم عشان تعرفوا تعيشوا صح.